رباعیات rubaiyat Hazrat peer syad nasir hussain chishti sialvi rubaiyat
رباعیات rubaiyat Hazrat peer syad nasir hussain chishti sialvi rubaiyat |
توں جیوں میں مر جاؤں شالا اتے جیون یار اساڈے
جیڑے سانوں کول بلا کے ٹر گئے آپ دراڈے
ہر گل بس منواندے اپنی اک ضدی اک ڈاہڈھے
ناصر لاڈیاں سجناں بخشے سانوں درد وی لاڈے
بولی بولی سجن وی جھلیاں گیت سجن دے گا توں
بے دلدار نوں راضی کرنا ئیں بلہے وانگ منا توں
محبوباں دے پیر دے جوڑے سردا تاج بنا توں
جے دیوے جگ طعنے ناصر ہس ہس جھولی پاتوں
اک در چنگا سو در نالوں در در توں کیہ لیناں
کنڈ پچھے ہر شے نوں کر کے من دلدار
دا کہناں
تسبیح اتے نام سجن دا ناصر پڑھدیاں رہناں
سب توں وڈی یار عبادت یار دے قد میں ڈھیناں
یا رب فضل تیرے دا منگیا تیتھوں خیر کمینے
دیس وکھا اور تلیاں لائیں جتھے ڈھول نگینے
ایہو حسرت ہاہواں بھر دی رہندی اے وچ سینے
دیوے رب توفیق بے ناصر مریئے شہر مدینے
عشق اچ رونا عین عبادت جو رووے پھل پاوے
روون نال وفا دے بوٹے رہن ہمیشہ ساوے
جو رووے دل دھووے اپنا دلدا زنگ لتھ جاوے
رون والے دے گھر ناصر اکثر ماہی آوے
آعشقا باہناں پھڑ ل صیری رل کے ویسے دونویں
جیویں ملیا لوصیری نوں یار ملا دے اونویں
اک واری تے کہہ دے مینوں شالا کدی نہ روویں
اونہوں کیہڑے گھاٹے ناصر جس دے کول توں ہوویں
آ دردا رو سینے اندر تینوں میں مہمان بناواں
آپ رلاں میں وچ گلیاں دے تیری اچی شان بناواں
جگر کلیجہ پیش کراں میں انج دستر خوان وچھاواں
تو ماہی دا درد ایں ناصر تینوں اپنی جان بناواں
جان بنا کے تینوں اپنی تیرے دردا ناز اٹھاواں
پلنگھ وچھا کے دل اپنے دا تینوں ریجھاں نال بٹھاواں
کر کے عرق کشید اکھیاں چوں تینوں بھر بھر جام پیاواں
ناصر ایہو دعائیں دیوے توں جیویں میں مر جاواں
Comments
Post a Comment