حضرت پیر سید ناصر چشتی سیالوی رباعیاں
جیہڑے سینے وچ عشق حبیب دا اے
اللہ تائیں اوہ سینہ پسند آیا
اقصی اندر امامت لئی انبیاء نوں
صرف عربی نگینہ پسند آیا
عطرپھلاں گلاب چنبیلیں توں
اوہدا نوری پسینہ پسند آیا
بڑے بڑے زمانے وچ شہر ڈٹھے
ناصر مینوں مدینہ پسند آیا
اوس ویلے نوں کر یاد تیرے
جدوں موت آویٹہرے وچ ڈھکنا ایں
ثابت رویں جے وقت آزمائش دے توں
تیرے آگے فرشتیاں جھکنا ایں
جےراہدی بغداد چوں ملی تینوں
رولا فیر مسافرا مکنا ایں
ناصر جینے سرکار نوں ویکھیا اے
اوہنے فیر شراب تے تھکنا ایں
میرے نبی ﷺ دی شان مقام اعلی
غم گسار وی اے ملن ساری وی اے
ہے بے عیب دا یار بے عیب سوہنا
پر اسرار وی اے پر انوار وی اے
اچا اچیاں توں سچا سچیاں توں
شہر یار وی اے تاجدار دی اے
صدقے ناصر کریم دے کرم اتوں
کردا پیاروی اے دیندا تار وی اے
لگے ہوۓ سن جیہڑے جہالتاں دے
میرے نبی نے گل ای بدل دتے
بند پے سن جیہڑے ہنیریاں وچ
مصطفی نے بل ای بدل دتے
کر دے پئے سن صرف جو غلط پاسے
کر کے کرم اوہ ٹل ای بدل دتے
صرف صورتاں بدلیاں نہیں ناصر
کملی والے نے دل ای بدل دے
اہدی زلف نوں چھو کے ہوا لنگھی
جتھوں گزری چمن نکھار دی گئی
ونڈ دی گئی مہکار دے اوہ تحفے
کلی کلی دا چہرہ سنوار دی گئی
اہدے لباں چوں جدوں دعا نکلی
تالے دوزخ دے بوہے نوں مار دی گئی
جس دم یاد آئی ماہ طیبہ دی
ناصر سینے غلاماں دے ٹھار دی گئی
دھون چکے گا جتھے فرعون کوئی
وجدا اوتھے کلیم دا ڈنڈا رہناں
جانے ٹٹ ترازو تے باطلاں دے
اکو ٹھیک اسلام دا کنڈا رہناں
جنی دیر نے آقا زمین اتے
ادودوں تیک ہے دوزخ وی ٹھنڈا رہناں
ہونے سرنگوں پرچم ساریاں دے
اچا ناصر حضور داجھنڈا رہناں
جے نہ لوح محفوظ دا پتہ ہووے
اسیں اوس پرواز نوں من دے نیں
جہدا پیر نہیں آپ دی پیروی تے
بالکل اہدے اعجاز نوں من دے نیں
جیہڑا وجے نہ عشق دی لے آتے
ایسے کسے وی ساز نوں من دے نیں
جہدے وچ نہیں اہدا خیال ناصر
اسیں اوس نماز نوں من دے نئیں
میرے نبی دی شان کیسے پچھنا ایں
شافعی یوم النشور را آکھدے نیں
دیہاڑے انزال توں اج تک جو ہویا
فیض اہدے ای نور دا آکھدے نیں
میتھوں سنگیوں پتہ کہ پچھدے او
مینوں پتلا تصور دا آکھدے نیں
ایناں پتہ اے ناصر توں لوک سارے
نعت خوان حضور دا آکھدے نیں
Comments
Post a Comment